Moob yeej ib txwm nyob sau tej laaj roob sab txug le 5000 feet rov sau xwb. Moob yeej nyob le nuav tau ntau puas xyoo lug lawm. Feem coob ntawm peb cov Moob nyob rua Axia phaab nub tuaj qaabteb. Ntaub ntawv qha tseg has tas, muaj 10 plhom tug Moob nyob rua 13 lub tebchaws huv qaab ntuj nuav. Lub tebchaws kws muaj Moob coob tshaajplawg yog Suavteb, muaj txug le 8 plhom. Ntaub ntawv Suav yeej qha txug has tas, Suav yeej pum Moob nyob lawv tug dlej Yetze nuav 5000 xyoo B.C. lug lawm.
Dlua le ntawd, muaj 3 phlom tug Moob nyob rua Npaajlaaj, Lostuas, Thaib, hab Maaj teb. Lawv le ntaub ntawv tau sau tseg, cov Mob Amauj yog cov kws xub lug ntseeg Vaajtswv. Puab lug ntseeg Yexus kwvlaam xyoo 1900. Tabsis lug txug xyoo 1949, txujmoo zoo maam le tuaj txug Moob nyob Lostsuas teb. Moob maam lug ntseeg Yexus rua xyoo 1950 ntawd. Tuab lub sijhawm nuav, txujmoo zoo kuj tuaj moog txug Thaibteb. Cov Moob nyob Thaibteb kuj lug ntseeg Vaajtswv kwvlaam xyoo 1950 ntawd hab. Nyob rau Lotsuas, txij xyoo 1950 lug txug xyoo 1975, cov ntseeg Yexus kws yog Moob nyob Lostuas tub muaj txug le 15 txheej leej lawm
Lub xuv tooj cua “The Far East Broadcasting Company” tau tshaajtawm txujmoo zoo ua lug Moob rua phaab Axia tau ntau lub xyoo. Xyoo 1988, thawj tug Moob nyob Nyaablaj teb tau lug ntseeg Yexus. Cov lug ntseeg Yexus tau tshaajtawm txujmoo zoo nuav rua cov kwvtij neej tsaa, muaj Moob coob heev nyob Nyablaaj teb tau lug ntseeg Yexus. Cov thawjcoj kws ntseeg Yexus kwvyeeg has tas, muaj txug le 300 txheeb leej Moob tau lug ntseeg Yexus. Lub Koomhum pawg ntseeg Tinh Lanh muaj cov pawg ntseeg Moob kws tuaj zwm rua puab txug le 1000 tawm pawg ntseeg.
Feem coob ntawm cov Moob nuav tsi paub lub lub tebchaws kws puab nyob tej ntaub ntawv. Vim tsi muaj tsev kawm ntaub ntawv rua puab moog kawm ntawv. Xyoo 19850, thawj cov ntawv Moob tau raug rhawv ua tsaj ntawv Suav nyob rua Suavteb. Puab yeej txhais phoo Vaajlugkub hab phoo Nkauj ua cov lug Moob Amauj nuav lawm. Lug txug rua xyoo 1951, tub xaa moo zoo Linwood Barney tuaj nrug Moob nyob rua Xeev teb. Nwg txhaj le chiv ua cov ntawv Moob kws naj nb nwg nuav peb tau siv nuav. Xyoo 1953, nwg ua taag hab tso rua cov tub xaa moo zoo. Barney rov qaab moog rua Amelikas teb xyoo 1954 lawm.
Cov tub xaa moo zoo kub sab txhais Vaajlugkub Tshab lug ua lug Moob. Tuab lub sijhawm kws puab tseem taabtom txhais phoo Vaajlugkub nuav yuav tav, num tswv Lotsuas tsi pub siv cov ntawv Moob tsaj ntawv Latees nuav. Cov tub xaa moo zoo txhaj le ua dlua ib cov ntawv Moob kws siv tsaj ntawv Lostuas. Xyoo 1972, Phoo Vaajlugkub Tshab kws yog lug Moob Lotsuas tau raug luam tawm rua Moob tau siv. Tuab lub sijhawm nuav, lub Thailand Bible Society kuj luam tau phoo Vaajlugkub Moob kws yog siv ntawv Latees rua cov ntseeg kws nyob Thaibteb tau siv. Num tswv Thaib los tsi kaam cov ntseeg siv phoo Vaajlugkub kws yog ntawv Latees hab. Cov tub xaa moozoo txhaj le ua dlua ib cov ntawv siv tsaj ntawv Thaib. Tabsis, puab tub luam tau cov Vaajlugkub Moob ntau txheeb phoo lawm. Vim le nuav, xyoo 1980, cov tub xaa moo zoo txhaj le xaa cov Vaajlugkub nuav tuaj rua peb Moob tau siv nyob Amelikas. Txawm yog numtswv Lotsuas hab Thaib tsi pub Moob siv cov ntawv Moob kws yog tsaj ntawv Latees los cov Moob ntseeg Yexus kws moog nyob Amelikas yeej siv cov ntawv nuav ntau heev. Naj nub nwg nuav, cov ntawv Moob Latees nuav raug cov Moob nyob thoob nplajteb nuav siv ntau tshaaj lwm yaam ntawv. Peb ua Vaajtswv tsaug kws cov tub xaa moo zoo tau tuaj rhawv cov ntawv Moob Latees nuav rua peb tau siv lug ua kev txuas lug nruab cov Moob nyob txhua lub tebchaws. Qhov tseem ceeb yog siv cov ntawv nuav lug txhais phoo Vaajlugkub ua lug Moob rua cov ntseeg tau nyeem Vaajtswv txujlug.
Cov nsteeg nug has tas, tom qaab peb ntseeg Yexus lawm peb yuav ua dlaabtsi? Zag nuav peb muab kev teev dlaab tso tseg taag, peb yuav dlaabtsi? Peb yuav cobqha le caag cov Moob ntseeg Yexus txhaj luj hlub rua Vaajtswv? Thaus ib tug Moob lug ntseeg Yexus nwg tau hloov nwg txuj kev ntseeg lug rua Yexus. Puab yeej tseem coj tej yaamkev ntseeg nyob huv qub kevcai nrug puab lug. Vim le nuav, peb txuj kev ntseeg txhaj le tsi luj txug theem kws peb yuav cobqha tau lwm tug ua thwjtim.
Cov ntseeg coob leej ntau tug yeej tseem tsi tau nkaag sab txug txujmoo zoo kws Yexus tau lug tuag theej tuabneeg lub txhoj. Muaj coob leej ntau tug thim rov moog coj dlaab qhua vim tsi muaj leejtwg cobqha puab kuas paub Yexus zoo.
Nuav txhaj le yog lub homphaj ntawm “Koomhum Cobqha Thwjtim.” Peb muaj nyob lug coj tuabneeg lug ntseeg Yexus, cobqha puab ua Yexus le thwjtim, hab cobqha kuas puab txawj moog cobqha lwm tug ua thwjtim.
Koj puas kaam paab peb ua teg dlejnum nuav? Peb cheemtsum nyaj lug sau ib cov ntaub ntawv, cog rua txujmoo zoo, lug qha cov ntseeg. Peb cheemtsum nyaj taug kev moog cobqha cov thawjcoj cobqha thwjtim nyob huv tej pawg ntseeg.
Koomhum Cobqha Thwjtim (KCT) muaj nyob lug ua lawv le Yexus cov lug qha, mej ca le tawm moog qha txujmoo zoo hab coj tuabneeg lug ua Yexus le thwjtim (Mathais 28:19-20). Peb teg dlejnum yog moog rua txhua qhov kws muaj Moob nyob hab qha txujmoo zoo rua puab, coj puab lug ntseeg Yexus, cobqha puab ua Yexus le thwjtim, hab cobqha puab kuas puab txawj moog cobqha lwm tug ua thwjtim.
